WALK with a Doc

Photo Credit: Dr. Arleen Joy Vallejo

Ang Municipal Health Office sa banwa kang Bugasong, sa pagpakig-angut sa W.A.L.K with a Doc Philippines nga ginapamunuan ni Dr. Arleen Joy Vallejo, ang nag-organisar kang ikarwa nga "WALK with a Doc" nga nagatuyo nga magtugro kinaaram kag importansya sa ikaayong lawas kag mayad nga pagpangabuhi. Dya angut man sa pagselebrar kang ika-45 nga Nutrition Month sa banwa kang Bugasong nga may Tema: "Kumain ng Wasto at Maging Aktibo, Push Natin 'to!" kon sa diin dya ang gintambungan kang duro nga mga katawhan nga naghalin sa nanari-sari nga mga kabarangayan.

Sa amo nga kahiwatan, ang mga nag entra nga naglab-ot sa darwa ka gatos kag kinse (215) ka katawhan ang nagparanaw halin sa Municipal Plaza paagto sa Barangay Sabang West kang dya nga banwa kag magbalik sa Municipal Plaza para sa sangka bugu nga programa kaimaw kay Dr. Vallejo.


Nagtambong man si Acting Mayor Renante S. Dava kag pira ka mga lideres kang mga kabarangayan sa banwa kang Bugasong kag kaimaw man nga nagpartisipar sa kahiwatan amo ang mga kababainhan kag mga kabataan.

Ang "W.A.L.K. with a Doc" ang nagakahulugan nga "Win Against Lifestyle-Disease Killers" ukon sangka programa kang Municipal Health Office kag W.A.L.K. with a Doc Philippines para maparapta ang impormasyon para sa ikamayad kang lawas, ilabi ron gid ang paglikaw sa pagpanigarilyo kag iba pa nga mga bisyo nga makaharalit.
Photo from: Jose Marie C. Barcelo FB Account

Sa pagtapos kang programa, ang mga tagsakdag ang nakatipon kang kabilogan nga kwarta nga naglab-ot sa Sangka Libo, Pito ka Gatos kag Kinse (1,715) Pesos, kon sa diin, suno kay Mr. Jose Marie C. Barcelo, Public Health Nurse kang Municipal Health Office, ang amo nga pondo ang pagagamiton para sa paghimo kang mga reading materials ukon barasahon parte sa mga makaharalit nga epekto kang pagpanigarilyo para sa tinutuyo nga "Smoke Free Bugasong." Photo from: Jose Marie C. Barcelo FB Account

 

---

Other posts

• Community Fish Landing Center sa Brgy. Jinalinan, Padayon nga Ginaobra
• Sa Kada Takmu, Gugma
• Biktima kang Landslide, Nakabaton Suporta-Pinansyal
• Biktima kang Buhawi sa Sitio Villasis, Nakabaton kang Bulig Pinansyal
• Agosto 12, Gindeklarar kang Presidente nga Regular Holiday
• Panay FM Radio Stations
• Smoke-Free Task Force naghinun-anun para sa sangka Smoke-Free Bugasong
• VIRAL! Maestro, Ginsorpresa kang ana mga Estudyante.
• Mga Supporters ni Mayor John Lloyd Pacete, Nag-Prayer Rally
• Kasadyahan sa Tindahan